Saturday, May 19, 2018

கருதியது நடந்தது: எடியூரப்பா விலகல்! – இலக்குவனார் திருவள்ளுவன்


கருநாடகாவில் கருதியது நடந்தது:  எடியூரப்பா விலகல்!

   15 நாள் கால வாய்ப்பில் ச.ம.உ.களை வாங்கி ஆட்சியைச் சிக்கலின்றி அமைக்கலாம் எனப் பாசக திட்டமிட்டது. ஆனால் உச்ச நீதிமன்றம் 24 மணி நேர வாய்ப்பே அளித்தமையால் பேர வணிகத்திற்கு வாய்ப்பில்லாமல் போனது. இச்சூழலை எதிர்பார்த்தே எடியூரப்பா விலக  வேண்டும் என நேற்று குறிப்பிட்டிருந்தோம்,( எடியூரப்பா, கருநாடக ஆளுநர், நரேந்திரர் ஆகியோர் பதவி விலக வேண்டும். )
  மோசமான தோல்வியை வெளிப்படுத்துவதை விட விலகுவதே மேல் எனக் குறுக்கு வழியில் கருநாடகாவின் முதல்வராகப் பொறுப்பேற்ற எடியூரப்பா பதவி விலகினார். விலகல் காரணம் என்னவாயினும் அவருக்கு வாழ்த்துகள்! இதனால் கொல்லைப்புற வழியில் ஆட்சியைப் பிடித்துத் தென்னகத்தின் மாபெரும் நுழைவு எனப் பரப்புரை மேற்கொள்ள நினத்த பாசகவின் கனவு பொய்த்தது.
  பாசக இப்பொழுது  பேராயக்(காங்.)கட்சி, ம.ச.த. கட்சியின் கூட்டை எதிர்த்துக் கூறிய தகவல் அக் கட்சிக்கும் பொருந்தும்தானே! ஆனால், ம.ச.த. உடன் கூட்டணி வைக்க முயன்றதே பாசக!  இரண்டு எதிர்க்கட்சிகளிலிருந்தும் ஆட்களை இழுக்க முயன்றதே!
 ஆனால், கடிபட்ட நரி மேலும் குழப்பத்தை உண்டு பண்ணும். பாசகவினர் பதவி விலகும் முடிவு எடுத்தால் பலர் ஒத்துக் கொள்ள மாட்டார்கள். அமைதியாக மத்திய ஏவல் துறைகளின் மூலமும் பேராசை காட்டியும் பலரை விலைக்கு வாங்கி ஆட்சியைக்  கவிழ்க்க முயலும். பிற கட்சியினரும் மக்களும் விழிப்பாக இருக்க வேண்டும்.
 மக்கள் நாயகம் நிலை நிற்க உதவிய உச்சமன்ற  நீதிபதிகளுக்கும் போராடிய வழக்குரைஞர்கள் அரசியல்வாதிகள், ஊடகத்தினர், கட்சியினர், வலை யன்பர்கள் ஆகியோருக்கும் பாராட்டுகள்.
நாம் முன்பே கூறியபடி இவ்வாறு தவறான செயல்பாட்டிற்கு வழி வகுத்த ஆளுநர் வாயூபாய் வாலா,  தூண்டுகோலாக இருந்த தலைமையர்   நரேந்திர (மோடி),  தொடர்புடையோர் மான உணர்வு இருப்பின் பதவி விலக வேண்டும்.
 நரேந்திர மோடி  கருநாடகாவில் 21  தொகுதிகளில் பேசினார். ஆனால்  இவற்றுள் பாசக 10 தொகுதிகளில் தோல்விதான் தழுவியுள்ளது. பாசகவிற்கு வெற்றி என அடையாளம் காட்டிக் கொண்ட 46  தொகுதிகளில் 41 தொகுதிகளில் தோல்வியைத் தழுவியுள்ளது.
மோடி இல்லாத பொழுது பாசக வெற்றி பெற்ற தொகுதிகளை விட இப்பொழுது குறைவான தொகுதிகளிலேயே வெற்றி கண்டுள்ளது.
29  தொகுதிகளில் மிகக் குறைவான வாக்குகள் பெற்று பாசக காப்புத்  தொகையை இழந்துள்ளது.
இருப்பினும் மாபெரும் வெற்றி எனக் கூக்குரலிட்டு மக்களை மயக்க முயலும் அமீத்து  சா கட்சித்தலைமைப் பொறுப்பிலிருந்து விலக வேண்டும்.மோசடிக்குத் துணை நின்ற அனைவருமே தத்தம் பொறுப்புகளில் இருந்து விலக வேண்டும். ஆனால், இத்தகைய பண்பு நம் நாட்டில் இல்லை.
சாதி, சமய, மத, இன வெறி பிடித்தவர்களை ஓரங்கட்டியுள்ள கருநாடாகாவிற்குப்பாராட்டுகள்!
ஓர்ந்துகண் ணோடாது இறைபுரிந்து யார்மாட்டும்
தேர்ந்துசெய் வஃதே முறை.(திருவள்ளுவர், திருக்குறள் 541)
 என நடுநிலையுடன் தீர்ப்பு வழங்கிய உச்ச மன்ற நீதிபதிகள் ஏ.கே.சிருகிரி(AK Sikri),  சரத்து அரவிந்து  போபுதே (SA Bobde),  அசோக்கு பூசன்( Ashok Bhushan) ஆகியோருக்கு மீண்டும் பாராட்டுகள்!
  • இலக்குவனார் திருவள்ளுவன்

Friday, May 18, 2018

எடியூரப்பா, கருநாடக ஆளுநர், நரேந்திரர் ஆகியோர் பதவி விலக வேண்டும் – இலக்குவனார் திருவள்ளுவன்


எடியூரப்பா, கருநாடக ஆளுநர், நரேந்திரர் ஆகியோர்

பதவி விலக வேண்டும்! 

  கருநாடக முதல்வர் எடியூரப்பா  நாளை (19.05.2018) மாலை 4.00மணிக்கு நம்பிக்கை  வாக்கு கோர வேண்டும் என்ற நலல தீர்ப்பை உச்சநீதிமன்ற நீதிபதிகள் தெரிவிததுள்ளனர்.
 உச்ச மன்ற நீதிபதிகள் ஏ,கே.சிருகிரி(AK Sikri  ),  சரத்து அரவிந்து  போபுதே (SA Bobde )  அசோக்கு பூசன்( Ashok Bhushan) ஆளுநர் பதவிக்கு மதிப்பளித்து அதே நேரம் மக்களாட்சி மாண்பு காக்கப்படவேண்டும் எனச் சரியாகத் தீர்ப்பு வழங்கியுள்ளனர்.
  யாருக்கும் அறுதிப் பெரும்பான்மை இல்லாத பொழுது தனிப் பெரும்பான்மை உள்ள கட்சிக்கு ஆட்சி அமைக்க முன்னுரிமை வாய்ப்பு அளிப்பதே முறையாகும்,  ஆனால், கோவா, மணிப்பூர், மேகாலயா, பீகார்  முதலான மாநிலங்களில் தனிப் பெரும்பான்மை பெற்றிருந்த  பேராயக்(காங்.,)கட்சி, இராசுட்ரிய  சனதா தளம் ஆகியவற்றுக்கு வாய்ப்பளிக்காமல்  பாசக கூட்டணி ஆட்சி அமைக்கும் வகையில் ஆளுநர்கள் செயல்பட்டனர். இங்கெல்லாம் தனிப் பெரும்பான்மை பெற்ற கட்சிகளுக்கு ஆட்சியமைக்கும் வாய்ப்பு அளித்திருந்தால் அக்கட்சிகள்தாம் ஆட்சி அமைத்திருக்கும்.
  இந்தத் தவறு நேரக்கூடாது எனக் கருதிக் கருநாடகாவில் தனிப் பெரும்பான்மை பெற்ற பாசகவிற்கு ஆட்சி அமைக்கும் உரிமை அளித திருந்தால் சரிதான். ஆனால், அங்கே மொத்தம் 3 கட்சிகளும் இரு தனியரும் தான் வெற்றி பெற்றவர்கள். பாசக தவிர மீதி இரு கட்சிகளும் கூட்டணி  அமைத்து ஆட்சியுரிமை கோரியுள்ளனர். இச்சூழலில் பாசகவிற்கு ஆதரவு தரும் கட்சிகள் எதுவும் இல்லை. அஃதாவது வேறு  கட்சிகளே இல்லாத பொழுது ஆதரவு வாய்ப்பு என்பதற்கே இடமில்லாது போய்விட்டது.  எனவே பாசகவின் தனிப்பெரும்பான்மையால் பயனில்லை, எனவே முதலில் 2 நாள்  அடுத்து 7 நாள் என்று கூறிக்கொண்டிரு்நத பாசக எடியூரப்பாவிற்கு சட்ட மன்றத்தில் பெரும்பான்மையை மெய்ப்பிக்க 15 நாள் கால வாய்ப்பு தந்துள்ள  செயல் மக்கள் நாயக முறைக்கு எதிரான செயலாகும்.
 அறுதிப்பெரும்பான்மை இல்லாத ஒருவருக்கு எதற்கு 15 நாள் கால வாய்ப்பு தர வேண்டும்?  ஆட்சி அமைக்க உரிமை கோரியுள்ள எஞ்சிய 2 கட்சிகளிலிருந்தும் பெரும்பான்மைக்கு வேண்டிய  எண்ணிக்கையிலான சட்டமன்ற உறுப்பினர்களை மிரட்டியும் கொடுக்க வேண்டியவற்றைக் கொடுத்தும் விலைக்கு வாங்கத்தானே! இஃது அப்பட்டமான முறை கேடல்லவா? அதற்கு ஊக்கம் அளிக்கலாமா? ஆளுநர் கட்சி மேலிடத்திற்கிணங்கக் கட்சிக்காரராகச் செயல்படுவது மிகப் பெருந்தவறல்லவா?
 எதிர்த்துப் போட்டியிட்டுவிட்டு போட்டிக்கட்சியுடன கூட்டணி வைப்பதில் விருப்பமில்லை எனப் பேராயக்(காங்)கட்சி ம.ச.த. உறுப்பினர்கள் கூறி்த் தங்களுக்கு ஆதரவு தருவதாகப் பாசக கூறுகிறது. அப்படி என்றால், இதேபோன்ற நிலைப்பாட்டைப் பாசக உறுப்பினர்களும் எடுத்து அக்கட்சியிலிருந்து விலகலாம் அல்லவா? எனவே சட்டமன்றப் பெரும்பான்மையக் காட்டுவதற்காகப் பாெய்யான தகவல  தரிவிததுக் கால வாய்ப்பு பெறுவதே கட்சித்தாவல தடைச்சட்டத்தைக் கேலிக் கூத்தாக்கத்தான்!
  பெரும்பான்மை என்பது சட்ட மன்ற உறுப்பினர்கள்  எண்ணிக்கை அடிப்படையில் இல்லை.  வருகையின் அடிப்படையில்தான். எனவே, நாளைக்குள் கட்சி மாறுவதற்கான பேரம் படியாது என்பதால் பன்னிருவரைச் சட்டமன்றத்திற்கு வாக்கெடுப்பின் பொழுதுவரவிடாமல்  செய்து  பெரும்பான்மையைக் காட்ட எடியூரப்பா முயலக்கூடாது. ச.ம.உறுப்பினர்கள்  தொடர்பு எல்லைக்கு அப்பால் இருப்பதால், நாளைக்குள் ஏவல் துறைகள் மிரட்ட வாய்ப்பில்லை. குடும்பத்தினர மூலமும் உடனடியாக உரிய பேரங்களை முடிக்கமுடியாது. அவ்வாறு  இயலும்எனில் 15 நாள்வாய்ப்பு கேட்டிருக்கமாட்டார்களே! எனவே நம்பிக்கை வாக்கெடுப்பை எதிர்கொள்ளாமல் முன்னதாகவே பதவி விலகுவதே எடியூரப்பாவிற்கும் அவர் கட்சிக்கும் நல்லது.
 29 தொகுதிகளில் காப்புத் தொகையைப் பறிகொடுத்து  மாபெரும் தோல்விகளைச் சந்தித்த பின்பும்  குறுக்குவழிகள் மூலம் ஆட்சிக்கட்டிலில் ஏறிப் பெரும் வெற்றியாகப் பரப்ப பாசக திட்டமிட்டு வருகிறது. எனவே கருநாடகா ஆட்சிதான் வேண்டும் என்றால் கோவா முதலான மாநில ஆட்சிகளைத் தனி்ப்பெரும்பான்மைக் கட்சிகளிடம் பாசக ஒப்படைக்கட்டும் அதுவே முறையாகும்.
 ஆளுநர் குடியரசுத்த்லைவரின் முகவர் என்றாலும் கட்சித்தலைமையின் ஆட்டத்திற்கேற்ப ஆடுபவர். எனவே கருநாடக ஆளுநர் வயூபாய் வாலா(Vajubhai Vala) கட்சி மேலிடத்திற்கேற்பவே  அறமற்ற முடிவை எடுத்துள்ளார். தன்பதவி நிலைக்கு எதிராகச் செயல்பட்டதால் அவர் பதவி விலகுவதே முறை.
அவரை இவ்வாறு செய்யத் தூண்டிய தலைமை அமைச்சர் நரேந்திர(மோடி),  பதவி விலக வேண்டும்;  அரசுப்பணிகளில் குறுக்கீடு  செய்த அமீது சா கட்சித்தலைமைப் பொறுப்பில் இருந்து விலக  வேண்டும்.
 கன்னெய், நில நெய் (Petrol, Diesel) ஆகிய எரி நெய்களின் விலை அன்றாடம்  வரையறை செய்ய்ப்படுகிறது. ஆனால், கருநாடகத் தேர்தல்களுக்காக 19 நாள் விலை வரையறை மேற்கொள்ளாமல் விலை உயர்த்தப்படாமல் பாசக அரசு பார்த்துக்கொண்டது. இதனால் 500 கோடி உரூபாய் இழப்பு ஏற்பட்டுள்ளது. இது மிகப் பெரும் ஒட்டுமொத்த தேர்தல் கையூட்டாகும். எனவே வெளிப்படையாகவே  தெரியும் இவ்வூழலுக்காக வெற்றி பெற்ற பாசக உறுப்பினர்களின் வெற்றி செல்லாது எனத் தேர்தல் ஆணையம் அறிவிக்க வேண்டும். அப்பொழுதுதான் அரசுகளின் தேர்தல் ஊழல்களுக்கு முற்றுப்புள்ளி வைக்க முடியும்.
மிகப்பெரும் மக்களாட்சி நாடான இந்தியாவில் மக்களாட்சி நெறிகள் தொடர்ந்து குழிதோண்டிப் புதைக்கப்பட்டு வருகின்றன மக்களாடசி மாண்புகள் நிலைக்க மேற்குறித்தவாறு எடியூரப்பா,  வாயூபாய் வாலா, நரேந்திரர்(மோடி) பதவி விலகி மக்களாடசி மாண்பைக் காத்துப் பெருமை யடையட்டும்!
இலக்குவனார் திருவள்ளுவன்

Thursday, May 17, 2018

தமிழீழப் படுகொலை : உலகம் வருந்தவும் இல்லை! திருந்தவும் இல்லை! – இலக்குவனார் திருவள்ளுவன்


தமிழீழப் படுகொலை  : உலகம் வருந்தவும் இல்லை!

 திருந்தவும் இல்லை!

  ‘’யாதும் ஊரே! யாவரும் கேளிர்!’’,  ‘’பிறப்பொக்கும் எல்லா உயிர்க்கும்’’ ஆகிய தமிழ் நெறிகள் உலகெங்கும் பரப்பப்படவில்லை. இதனால், இனம், சமயம்(மதம்) முதலானவற்றின் அடிப்படையில் பாகுபாடு காட்டப்பெற்று உலகெங்கும் படுகொலைகள் நடந்து கொண்டிருக்கின்றன. இத்ததகைய படுகொலைகளிலிருந்து மீண்டவர்களும் இத்தகைய படுகொலைகளுக்குத் துணை நிற்கின்றனர். உலக நாடுகளைக் கட்டுப்படுத்தக்கூடிய உலக அமைப்பு எதுவும் உருவாகவில்லை. இருக்கின்ற உலக அமைப்புகள் வல்லமையாளர்கள் கைப்பிடிகளில் உள்ளன. எனவே அவர்கள் ஆட்டுவிப்பிற்கேற்ப ஆடுகின்றன. எனவே, மனிதப் படுகொலைகளுக்கு எதிரான செயல்பாடுகள் இல்லை. எனவே, தமிழீழத் தேசியத் துக்கநாளின் பொழுது நாம் உலக அமைதி அமைப்பு ஒன்று உருவாக்கப்பட வலியுறுத்துவோம்
  படுகொலைகள் பற்றிய வருத்தம் இருந்தாலல்லவா, அமைதியை நாடி மக்கள் செல்வர். ஆனால் மனிதப்பேரழிவுகள் பற்றிய எந்த ஓர் எண்ணமும்  இல்லாமல் அல்லவா உலகம் இயங்கிக் கொண்டுள்ளது.
 உலகில் தோன்றிய முதலினம் – தாயினம் – தமிழினம், தன் தாயகப் பகுதியிலேயே அழிக்கப்பட்டது குறித்து உலகம் கவலை கொள்ளவில்லை. எனவே, தமிழ் ஈழத்தில் இனப்படுகொலை தொடருகின்றது; மலேசியாவிலும் ஆதரவற்ற அடிமை இனமாகக் கருதி இன ஒடுக்கு நடை பெற்று வருகின்றது.
  பல நாடுகள் இணைந்து கூட்டாகக் கட்டற்ற வன்கொடுமைகளை அவிழ்த்துவிட்டுத் தமிழீழத்தில் இனப்படுகொலைகளை நிகழ்த்தியுள்ளன.
ஒரு தேசிய இனத்தை அல்லது சமய குழுவை முழுதாகவோ பகுதியாகவோ அழிப்பதை நோக்காக கொண்டு மேற்கொள்ளப்படும் செயற்பாடுகள் இனப்படுகொலை என ஐநா தீர்மானத்தில் வரையறுக்கப்பட்டுள்ளது.
ஈழத்தில் நடந்தது இதுதானே!
மனிதக் குழு ஒன்றினை முற்றாக ஒழிக்கும் முயற்சியுடன், அவர்களை முற்றாக அழிப்பதை நோக்காக கொண்டு மேற்கொள்ளப்படும் செயல்பாடே இனப்படுகொலை எனப்படுகிறது.
ஈழத்தில் நடைபெற்ற செயல்பாடும் இதுதானே!
ஓர்  இனக் குழுவின் உறுப்பினர்களைக்  கொல்வதும்  குழுவின் உறுப்பினர்களுக்கு உடலிலும் உள்ளத்திலும் கொடுந் தீங்கினை ஏற்படுத்துவதும் இனப் படுகொலை.
ஈழத்தில் நடைபெற்றதும் நடை பெறுவதும் இதுதானே!
அந்த இனக் குழுவில் புதிதாகப் பிறப்புகளைத் தடுக்கும் நோக்கில் செயற்படுவதும் இனப்படுகொலை.
கட்டாயக் கருத்தடைகள் மூலம் ஈழத்தில் இனப்படுகொலைதானே தொடருகின்றது.
  சுருக்கமாகச் சொல்வதானால், ஈழத்தமிழர்களுக்கு எதிராக இலங்கையின் சிங்கள அரசு மேற்கொண்ட -மேற்காெள்ளும் நடவடிக்கைகளே இனப்படுகொலை என வரையறுக்கலாம்.
சிங்கள அரசு மட்டுமல்ல  அதற்கு உதவிய இந்தியா முதலான நாடுகளும் இனப்படுகொலை புரி்ந்தவைதானே
இந்தியாவிற்கு அடைக்கலமாக வந்த தமிழர்களை விரட்டியடித்ததும் இனப்படுகொலைதானே!
குண்டடிபட்டும் கை கால் முதலான உறுப்புகள் இழந்தும் மருத்துவத்திற்காகத் தமிழ்நாட்டிற்கு வந்தவர்களை விரட்டியடித்ததும் இனப்படுகொலைதானே!
ஆள வேண்டியவர்களை வாழவிடாமல் அழித்த சிங்களத் தலைவர்களுக்கும் படைத்துறையினருக்கும் தண்டனை இல்லையே!
தண்டனைக்கு வாய்ப்பு இருக்கக்கூடாது என்பதற்காகப் பேரினப்படுகொலைகளை உள்நாட்டுப் போர் என்று மூடிமறைக்கின்றன உலக நாடுகள்.
சிங்கள இலங்கை அரசோ பயங்கரவாதிகளிடமிருந்து மக்களைக் காப்பாற்றினோம் என்கிறது.
போரில் ஏற்பட்ட படுகொலைகளால் மனம்மாறிப் புத்த சமயத்தைத் தழுவிய அசோக மன்னனால்தான் இலங்கையில் புத்தம் பரவியது. போரில்லா உலகத்தை உருவாக்கப்பாடுபட வேண்டிய இலங்கை அரசு – படுகொலைகளற்ற பாரினைப் (பூமியைப்) படைக்க வேண்டிய இலங்கையின் புத்த அரசு படுகொலைகளில்தானே இன்பம் காண்கின்றது. புத்தரும் பல சமயங்களும் தோன்றிய இந்தியாவின் ஆரிய அரசும் இனப்படுகாலைகளுக்கு உடந்தையாகவும் தூண்டுதலாகவும் இருப்பதில்தானே களிபேருவகை கொள்கிறது.
 10 ஆண்டுகள் ஆகியும் இனப்படுகொலைகளை இனப் படுகொலையாகக்கூடச் சொல்லாத நிலைதானே இன்றும் நிலவுகிறது. உலகம் இனப்படுகொலைக் குற்றத்தை இயல்பான குற்றமாகப் பார்க்கும் பொழுது இனப்படுகொலைக் குற்றவாளிகள் எங்ஙனம் குற்றத்தை ஒப்புக் கொள்வர்? குற்றத்தை ஒப்புக்கொள்ளாத பொழுது அதை உணர்ந்து வருந்துவது எங்ஙனம்?குற்றச்செயலுக்கு வருந்தாதவர்கள் திருந்துவது எவ்வாறு?  அவர்கள் திருந்தாத  பொழுது பிறரும் அக் குற்றப்பாதைகளில் செல்வதைத் தடுப்பது எப்படி?
போர் நிலததிலும் வாழ் நிலத்திலும் கொடுமையான முறையில்  உயிர் பறிக்கப்பட்ட ஈழத்தமிழர்களுக்கு நம்  அஞ்சலி!
அவர்களுக்கு வீர வணக்கங்கள் செலுத்தும் இந்நேரத்தில்
தமிழீழம் தமிழர்களின் தாயகம்
இனப்படுகொலையாளிகள் தண்டிக்கப்பட வேண்டும்
கொலைக்குற்ற உடந்தையாளர்களும் தூண்டியோரும் தண்டிக்கப்பட வேண்டும்
என்பதை உலகெங்கும் வலியுறுத்துவோம்!
வரும் துயர நாளிற்கு முன்னதாகவே  இவர்களுக்குத் தண்டனைகள் வழங்கச் செய்து மறைந்த மாவீரர்களுக்கும் மக்களுக்கும் உண்மையான அஞ்சலி செலுத்துவோம்!
எஞ்சியோர் உரிமை நிலத்தில் உரிமையோடு வாழ வழி  காண்போம்!
தமிழீழம் மலரட்டும்! உலகில் அமைதி தவழட்டும்!
வீர வணக்கங்களுடன் இலக்குவனார் திருவள்ளுவன்

பொய்களையே முதலீடு செய்யும் பாசகவின் வெற்றி மாயை! – இலக்குவனார் திருவள்ளுவன்



பொய்களையே முதலீடு செய்யும்

பாசகவின் வெற்றி மாயை!

 பொய்யிலே பிறந்து பொய்யிலே வளர்ந்தவர்களை  நாம் பார்த்திருக்கிறோம்.  அந்த நிலையையும் தாண்டி எப்பொழுதும் பொய்களையே முதலீடுகளாகக் கொண்டு பொய்வணிகம் புரிந்து மக்களை ஏமாற்றிப் பயனைடந்து வரும் கட்சி ஒன்று உண்டென்றால் அது பாசக ஒன்றுதான்.
  அண்மையில் (மே 2018) நடந்துமுடிந்த கருநாடகாவின் சட்டமன்றத் தேர்தலிலும்நாம் இதனைக் கண்கூடாகக் காண முடிகிறது. பாசக பல தோல்விகளைச் சந்தித்தும் மாபெரும் வெற்றியாகப் பொய்ப் பரப்புரை மேற்கொள்கிறது.அதன் ஆதரவுக் கட்சிகளும் நடுநிலையாகத்   தெரிவிப்பதுபோல் நடித்து  நரேந்திர(மோடி)யின் செல்வாக்கு உயர்ந்துள்ளதாகக் கதை அளக்கின்றன.
  அதன் காலடியை முதலில்  தழுவிக் குளிர் காய எண்ணும் ஒருவர், தென்மாநிலத்தில் நுழைவுவாயிலான  மாபெரும்  வெற்றி என்கிறார். தலைமைப் பதவியில் தொடர வேண்டும் அல்லது மாற்று உயர் பதவி வேண்டும் என விரும்பும் தமிழிசை கூறியிருந்தால் அஃது அவரது பிழைப்பு என விட்டு விடலாம்.  ஆனால், ஆளுங்கட்சியைச் சேர்ந்த –  ஆட்சிப்பொறுப்பில் முதன்மை இடத்தில் உள்ள ஒருவர்  கூறுகிறார் என்றால்  அவரும் மாயையில் மூழ்கிக்  கிடக்கிறார் அல்லது மாயையைப் பரப்பிப் பயனடைய விரும்புகிறார் என்றுதானே பொருள்.
 பாசகவின் ஆதரவிற்காகக் கருநாடகத் தேர்தலில் யாருக்கு ஆதரவு எனத்  தெரிவிக்காமல் பம்மிய, ஆளத் துடிக்கும் மற்றொரு தலைவரோ எண்ணிக்கை முடியும் முன்னரே  வாழ்த்தினைக் கொட்டுகிறார். தலைவர்களே மாயையில் சிக்கும் பொழுது எளிய மக்கள் இதில் வீழ்வதில் இயற்கைதானே!  இதன் மூலம் நாட்டின் பிற பகுதிகளிலும் குறிப்பாகத் தமிழ்நாட்டிலும் தன்னை வலுப்படுத்த பாசக முயல்கிறது. ஆனால் இம்மாயை நிலைக்காது.
 பொய்யை முதலில் பரப்புவதில் நரேந்திரரும் அமீத்தும் வல்லவர்கள்.  ஆந்திராவில் உள்ள தமிழ்நாட்டுப் பெண்மணியான நிருமலா சீதாராமனைக் கருநாடாகா மகள் என்றார் நரேந்திரர்(மேடி).
 படைத்தளபதிகள் கரியப்பா, திம்மையா  ஆகியவர்களைப்பற்றிய தவறான தகவல்களை அவரே வெளியிட்டுள்ளார். இதற்கு முன்னராக  இந்திராகாந்தி, பெனசீர் பூட்டோ, இராசீவுகாந்திபற்றி நாடாளுமன்றத்திலேயே தவறான தகவல் தெரிவித்தும் கவலைப்படாதவர்கள் எதற்குத்தான் கவலைப்படுவார்கள்? பொய் என்றால் சருக்கரைப் பொங்கலாயிற்றே அவர்களுக்கு!
  இப்படியெல்லாம் சொன்னவை பொய்கள் என மெய்ப்பிக்கப்பட்டதும் சிறு வருத்தமாவது தெரிவித்த வரலாறு உண்டா? அறியாமல்  சொல்லியிருந்தால் அல்லவா மன்னிப்பு கேட்கவோ வருத்தம்  தெரிவிக்கவோ முன்வருவர்.  தெரிந்தே சொன்ன பொய்களுக்கு வருத்தம் எதற்கு? திரியைக்கொளுத்திப் போடுவதுடன் வேலை முடிந்து விட்டது என அடுத்த பொய்யை அரங்கேற்ற வேண்டியதுதான்.
  நாடெங்கும் மக்கள் பணமதிப்பிறக்கத்தால் நடுத்  தெருக்களில் நின்று கொண்டு அல்லாடிக் கொண்டிருந்தனர். அப்பொழுது  பாசக தலைவர் ஒருவரின் மகள் புதிய பணத்தாள்களால் ஆன பணமாலையைக் கழுத்தில போட்டுக்  கொண்டு படம் எடுத்துக் கொண்டார். இவரைப் போல வேறுசில பாசகவினரும் புதிய பணமாலையை அணிந்த செய்தி வந்தது. பணக்கட்டுப்பாடு  ஏழை மக்களுக்கு விதிக்கப்பட்ட போதும் பாசக தலைவர்கள்  கோடிக்கணக்கில் பணம் செலவழித்து வீட்டுத்திருமணம் போன்ற நிகழ்ச்சிகளை மிகவும் ஆடம்பரமாக நடத்தினர். அவற்றில் குறிப்பிடத்தக்க ஒன்றுதான் கருநாடகாவில் சனார்த்தனன்(இரெட்டி) மகள் திருமணம் 650 கோடி உரூபாயில் நடைபெற்றது.
 முந்தைய  பாசக அரசின் வருவாய்த்துறைஅமைச்சர் கருணாகரன்(இரெட்டி), சுற்றுலாத்துறை அமைச்சர் சனார்த்தனன்(இரெட்டி), கருநாடகப் பால் கூட்டமைப்பின் தலைவர் சோமசேகரன்(இரெட்டி)  ஆகிய பண முதலைகளே இரெட்டி உடன்பிறப்புகள் என  அழைக்கப்பெறுகின்றனர்(தமக்கை இராசேசுவரி). பெல்லாரி  இரும்புச் சுரங்க 35,000 கோடி உரூ. ஊழல் வழக்கில் சிறைத்தண்டனை பெற்ற சனார்த்தனன்(இரெட்டி),  பிணையில் வந்து, குடும்பச் சொத்து 70 கோடி உரூபாய்  முடக்கி வைக்கப்பட்ட பொழுதும் உரூ.650 கோடி செலவழித்துத் தன் மகள் திருமணத்தை நடத்தியுள்ளார்.
  இரட்டி உடன்பிறப்புகளைப் பிணையில் கொண்டுவர பாசக நாடாளுமன்ற உறுப்பினராய் இருந்த வேட்பாளர் சிரீராமுலு நீதிபதிக்கு 500 கோடி உரூபாய் கொடுத்ததான காணொளி தேர்தலுக்கு முதல்நாள் வெளியாகியது.
 ஊழல் முதலைகளைத் தங்கள் பக்கம்  சேர்க்கவில்லை என்று கூறிக்கொண்டே இவர்கள் குடும்பத்தினர் 7 பேருக்குச் சட்டமன்றத் தேர்தலில் வாய்ப்பு கொடுத்தது. கருணாகரன், சோமசேகர் ஆகிய உடன்பிறந்தார் மட்டும் குறைந்த வாக்கு வேறுபாட்டில் வெற்றி கண்டுள்ளனர். ஒருவர் (சிரீராமுலு) ஒரு தொகுதியில் தோல்வியையும் மற்றொரு தொகுதியில் வெற்றியையும் தழுவியுள்ளார்.
சன்னா ஃபகிரப்பா என்னும் பாசக நாடாளுமன்ற உறுப்பினர் மகன் முத்து சன்னா ஃபகிரப்பா,  ஐவருடன் சேர்ந்து இளம்பெண்ணைத் தாக்கியதாகக் கைது செய்யப்பட்டவர்.
பாசக சட்டமன்ற உறுப்பினர்கள் சட்ட மன்றத்திலேயே  காணக்கூடாத காணொளியை அலைபேசியில் பார்த்தவர்கள். இவ்வாறு பல முறைகேடுகளுக்கும் ஒழுக்கக்கேடுகளுக்கும் ஆளான பாசக உத்தமர் வேடம் போட்டும் மக்களின் வெறுப்பிற்குள்ளாகிய நிலைதான் உள்ளது.
காவல் துறையில் சாதாரணக் காவலராக இருந்த செங்கா(இரெட்டி)யின் மக்கள்தான் இவர்கள். ஆனால், இன்றைக்கோ பல்லாயிரம்  கோடிக்கு உரிமையானவர்கள். பெல்லாரியின் ஆட்சியாளர்களே இவர்கள்தாம் என்னும்படிச்  செல்வச்செருக்கில் திளைக்கின்றனர்.
பாசக தமிழ்நாட்டில் கணிசமான தொகுதிகள் வெற்றி பெற்றால் மாபெரும் வெற்றி எனலாம். ஆனால் ஊழல் முதலைகளைப் போட்டியிடச்  செய்து, அதனால் அவர்கள் குடும்பத்தினர் சார்ந்த 15 இடங்களில் வெற்றி பெற முடியும் எனத் திட்டமிட்டு மாபெரும் தோல்விகளைத்தான் இத்  தொகுதிகளில் சந்தித்துள்ளது. இஃது எப்படி மாபெரும் வெற்றியாகும்?
 29 இடங்களில் 1595, 1915, 1961 என்பனபோன்று குறைந்த வாக்குகளைப் பெற்றுப் பாசகவினர் காப்புத்தொகை இழந்து மண்ணைக்  கெளவியுள்ளனர். அறிவுடன் சிந்திப்பவர்கள் இதனை மாபெரும் வெற்றி என்பார்களா?
  பாசகவின் முதல்முறை வெற்றி அல்ல இது. 2013 சட்டமன்றத் தேர்தலில் 114 இடங்களில் வென்ற பாசக, அவர்களின் பிதாமகர்கள் பல வாரங்கள் பரப்புரை மேற்கொண்டும் 104 இடங்களைத்தான் பிடித்துள்ளது என்னும் பொழுது தென்னிந்திய நுழைவிற்கான வெற்றி என்றால் பொருந்துமா?
 2014 நாடாளுமன்றத் தேர்தலில் 28 தொகுதிகளில் 17 தொகுதிகளில் வென்று 60 விழுக்காடு வாக்குகளைப் பெற்ற பாசக இப்போதைய ச.ம.தேர்தலில் 222 தொகுதிகளில் 104 தொகுதிகளில் மட்டும் வெற்றி பெற்று 46 விழுக்காடு வாக்குகள் மட்டும் பெற்றுள்ளது எப்படி மாபெரும் வெற்றியாகும்?
 வாக்குகள் எண்ணிக்கையில் இந்தியத் தேசியப் பேராயக்(காங்,)கட்சி 38 விழுக்காடு பெற்று முதலிடம் வகிக்கும் பொழுது 36.2 விழுக்காடு வாக்குகள் பெற்ற பாசக எப்படி மாபெரும் வெற்றி என்று வெட்கமின்றிக் கூறுகிறது என்றுதான் தெரியவில்லை
  கோவா முதலான பிற மாநிலங்கள் பலவற்றிலும்  தனிப் பெரும்பான்மை பெற்ற பிற கட்சிகளை ஒதுக்கிவைத்துவிட்டுக் குறுக்குவழியில் ஆட்சிக்கு வந்த பாசக இப்பொழுது சட்டமன்றத்தில் பெரும்பான்மை எண்ணிக்கை இல்லாத பொழுதும் தனிப் பெரும்பான்மை என்ற முழக்கத்தைக் கையில் எடுத்துக் கொண்டு ஆட்சிப்பீடத்தில அமர நாணம் கொள்ள வில்லையே!  முன்முறைகளைப் பின்பற்றிச் சட்டமன்ற பெரும்பான்மை இல்லாத பாசக ஆட்சிஅமைக்க உரிமையில்லை என  உச்சநீதிமன்றம் இறுதித்தீர்ப்பை வழங்கலாம். ஆனால், அதற்கான வாய்ப்பு நேராதபடி, பேர வணிகத்தைச் சிறப்பாக முடித்துக்கொண்டு ஆட்சியில் ஒட்டிக் கொள்ள பாசக முயன்று வருகிறது.
  பாசக மாநிலங்களில் – காசுமீராக இருக்கட்டும், உ.பி.யாக இருக்கட்டும் – எல்லா மாநிலங்களிலும் பெண்களுக்கும் ஒடுக்கப்பட்டோர்க்கும் உழவர் பெருமக்களுக்கும் மண்ணின் மைந்தர்களுக்கும் எதிரான அவலங்களே  நிகழ்கின்றன. ஆனால், பாசக, ஒரே சமயம் – இந்து;  ஒரே மொழி – சமற்கிருதமயமாக்கப்பட்ட இந்தி;  ஒரே கட்சி – பாசக என்னும் நிலைக்காக முயன்று வருகிறது. தோல்வியை வெற்றியாகக் காட்டும் பாசக தமிழ்நாட்டிலும் நச்சு விதை பரப்ப  மேலும் முனைப்பாகப் பணியாற்றும். நாம் விழிப்படைவோமா?
இற்பிறந்தார் கண்அல்லது இல்லை இயல்பாகச்
செப்பமும் நாணும் ஒருங்கு. (திருவள்ளுவர், திருக்குறள் 951)
வேதனையுடன் இலக்குவனார் திருவள்ளுவன்
இதழுரை, அகரமுதல: சித்திரை 30- வைகாசி 05, 2049 –  ஏப்பிரல் 16-22, 2018

Followers

Blog Archive